36
「所以Ｍ啊......你有咩保養頭髮技巧啊？」哈曼在我身邊跳來跳去。 「技巧得一個......」我將那碗薯蓉推走，然後離去：「唔好剪頭髮。」 「吓，咁樣都叫技巧！？」哈曼馬上追出來，扯扯我袍袖：「咁呢......如果我天生髮質係乾性，留長髮會唔會好似掃把頭咁？」 「唔會，地球有地心吸力......」 「咁如果我用髮膠呢？」哈曼抱住手。 「你有咪得囉。」 「但我無喎！邊到搵到啊？」哈曼張大嘴巴眼睛，十分愕然。 「唔知......」 「唔知咁你又講？」哈曼又變成詫異的表情。 「你問啊嘛......」我答。 哈曼再問：「咁如果我用水呢？我主要想撳低啲頭髮。」 「......」 雖然我已經擺出一張不太想理會哈曼的樣子，但他就像個窮追猛打的老頑童，在我離開吧檯並在香島樹內部參觀時，仍不停在我身邊圍繞，又將我身體當成鼓一樣拍打，並不斷喊著：「Ｍ！Ｍ！Ｍ！Ｍ！」，種種舉動和精神騷擾開始令我感到極之吃力。 凡是哈曼所到之地必地吵吵鬧鬧，我見香島樹內不少居民遇見他，第一反應都是移開目光，第二反應是遠離。 我終於明白，香島樹為什麼會不接納他。 我無法從哈曼身上洞悉到他的真實年齡，因為他有小孩的活潑，又有大人的外貌，唯一的特徵是他的隱性啤酒肚，即使衣服鬆垮垮也掩蓋不住。 最大問題是我走去哪，他就走到那。 「其實......點解你唔搵其他人呢？」我終於忍受不住，轉身一問。 「因為香島樹入面根本無人想理我。」哈曼說。 「我好欣賞你宜種樂天派。」我搭住他膊，說：「但你二十四小時都係咁嘅話，就係過度活躍症。」…
By
Chinese